कॉल मनी रॅकेट आंध्र प्रदेश

मटा ऑनलाइन वृत्त । चित्तूर आंध्र प्रदेशच्या विधानसभेत गाजत असलेल्या 'कॉल मनी रॅकेट'च्या जाळ्यात अडकलेल्या एका कुटुंबाने अय्यप्पा मंदिरात जाऊन देवदर्शन घेतले आणि जवळच्या तलावात उड्या मारुन आत्महत्या केली. शिव कुमार (३६), त्यांची पत्नी लिलावती (३०), मुलगा नवीन (८) आणि मुलगी काव्या (६) या चौघांनी धडाधड पाण्यात उड्या मारल्या. हा प्रकार पाहून तलावापासून काही अंतरावर असलेल्या लोकांनी धावत जाऊन वाचवण्याचा प्रयत्न केला पण तो अयशस्वी ठरला. सामूहिक आत्महत्येची माहिती मिळताच स्थानिक पोलिसांनी चौकशी सुरू केली आणि शिव कुमार 'कॉल मनी रॅकेट'च्या जाळ्यात अडकल्याचे उघड झाले. मागील काही महिन्यांपासून आंध्र प्रदेशमध्ये 'कॉल मनी रॅकेट' मोठ्या प्रमाणावर सुरू झाले आहे. झटपट कर्जाच्या जाहिराती वेगवेगळे मोबाइल नंबर देऊन ठिकठिकाणी प्रसिद्ध केल्या जात आहे. फोन करुन घरचा पत्ता देताच कर्ज देणाऱ्या संस्थेचा सदस्य घरी येतो आणि कर्जाची रक्कम देऊन एका हमीपत्रावर सही घेतो. या योजनेत १२० ते २०० टक्के दराने व्याज आकारले जाते. कर्जाचा एखादा हप्ता वेळेत दिला नाही तर लगेच फोन करुन कर्ज घेणाऱ्यावर दबाव टाकायला सुरुवात होते आणि त्यावेळी मागतील तेवढ्या रकमेचा हप्ता द्यावाच लागतो. अशाच एका घटनेत दीड लाखाचे कर्ज घेणाऱ्या महिलेला परतफेड करताना तब्बल सहा लाख रुपये मोजावे लागले. एका कुटुंबाला आपले घर गमवावे लागले. अन्य एका प्रकरणात कर्ज घेणाऱ्या महिलेने आपल्याला कर्जाचे हप्ते भर नाही तर मुलाला उचलून नेईन आणि मुंबईत विकून टाकेन अशी धमकी आल्याची तक्रार केली आहे. काही जणांनी कर्जाचे हप्ते फेडणे जमत नसल्यामुळे आत्महत्येचा प्रयत्न केला आहे. विरोधी पक्षाने आणि प्रसारमाध्यमांनी 'कॉल मनी रॅकेट'मध्ये सत्ताधारी पक्षातील नेत्यांचे नातलग गुंतले असल्याचा आरोप केला आहे. मुख्यमंत्री चंद्राबाबू नायडू यांनी सर्व आरोपांची दखल घेऊन सखोल चौकशीचे आदेश दिले आहेत. पोलिसांनी 'कॉल मनी रॅकेट'शी संबंधित विविध प्रकरणांचा तपास सुरू केला आहे. आतापर्यंत ३ जणांना अटक केली आहे. आणखी चारजणांचा शोध सुरू आहे. आंध्र प्रदेशच्या विधानपरिषदेतील टीडीपी आमदार बुद्ध वेंकण्णा यांचा भाऊ बुद्ध नागेश्वर राव यालाही पोलिसांनी पकडले आहे.