श्री महामृत्यूनजय कवच

🌹 *श्री महामृत्युंजय कवचम्* 🌹

ॐ अस्य श्री महामृत्युंजय कवचस्य श्री भैरवऋषिः । गायत्री छन्दः ।
श्री मृत्युंजय रुद्रो देवता । ॐ बीजम् । जूँ शक्तिः । सः कीलकम् ।
हृौं इति तत्त्वम् ।
चतुर्वर्गफल साधने वा अमुकस्य सर्व व्याधी नाशार्थे अभिषेके वा पाठे विनियोगः ।

॥ अथ ध्यानम् ॥

ॐ चंद्रमंडल मध्यस्थे रुद्रमाले विचित्रिते ।
तत्रस्थं चिंतयेत्साध्यं मृत्युं प्राप्तोऽपि जीवति ॥

॥ अथ कवचम् ॥

ॐ जूँ सः हृौं शिरः पातु देवो मृत्युंजयो मम ।
श्री शिवो वै ललाटं च ॐ हृौं भ्रुवौ सदाशिवः ॥ १ ॥
नीलकंठोऽवतान्नेत्रे कपर्दी मेऽवताच्छुती ।
त्रिलोचनोऽवताम्दण्डौ नासां मे त्रिपुरांतकः ॥ २ ॥
मुखं पीयूषघट भृदोष्ठौ मे कृतिकाम्बरः ।
हनुं मे हाटकेशानो मुखं बटुकभैरवः ॥ ३ ॥
कंधरां कालमथनो गलं गणप्रियोऽवतु ।
स्कंधौ स्कंदपिता पातु हस्तौ मे गिरिशोऽवतु ॥ ४ ॥
नखान्मे गिरिजानाथः पायादंगुलि संयुतान् ।
स्तनौ तारापतिः पातु वक्षः पशुपतिर्मम ॥ ५ ॥
कुक्षिं कुबेरवदनः पार्श्र्वौ मे मारशासनः ।
शर्वः पातु तथा नाभिं शूली पृष्ठं ममावतु ॥ ६ ॥
शिश्नं मे शंकरः पातु गुह्यं गुह्यकवल्लभः ।
कटिं कालांतकः पायदूरु मेंऽधकघातकः ॥ ७ ॥
जागरुकोऽवताज्जानू जंघे मे कालभैरवः ।
गुल्फौ पायाज्जटाधारी पादौ मृत्युंजयोऽवतु ॥ ८ ॥
पादादिमूर्द्धपर्यंतं सद्योजातो ममावतु ।
रक्षाहीनं नामहीनं वपुः पात्वमृतेश्र्वरः ॥ ९ ॥
पूर्वे बलविकरणो दक्षिणे कालशासनः ।
पश्चिमे पार्वतीनाथ उत्तरे मां मनोन्मनः ॥ १० ॥
ऐशान्यामीश्र्वरः पायादाग्नेयामग्निलोचनः ।
नैर्ऋत्यां शंभुरव्यान्मां वायव्यां वायुवाहनः ॥ ११ ॥
ऊर्ध्वं बलप्रमथनः पाताले परमेश्र्वरः ।
दशदिक्षु सदा पातु महामृत्युंजयश्र्च माम् ॥ १२ ॥
रणे राजकुले द्युते विषमे प्राणसंशये ।
पायादों जूँ महारुद्रो देवदेवो दशाक्षरः ॥ १३ ॥
प्रभाते पातु मां ब्रह्मा मध्यान्हे भैरवोऽवतु ।
सायं सर्वेश्र्वरः पातु निशायां नित्यचेतनः ॥ १४ ॥
अर्धरात्रे महादेवो निशांते मां महोदयः ।
सर्वदा सर्वतः पातु ॐ जूँ सः हृौं मृत्युंजयः ॥ १५ ॥
इतीदं कवचं पुण्यं त्रिषु लोकेषु दुर्लभं ।
सर्वमंत्रमयं गुह्यं सर्वतंत्रेषु गोपितं ॥ १६ ॥
पुण्यं पुण्यप्रदं दिव्यं देवदेवादिदैवतं ।
य इदं पठेन्मंत्रं कवचं वाच्ययेत्ततः ॥ १७ ॥
तस्य हस्ते महादेवि त्र्यंबकस्याष्टसिद्धयः ।
रणे धृत्वा चरेद्युद्धं हत्वा शत्रूञ्जयं लभेत् ॥ १८ ॥
जपं कृत्वा गृहे देवि संप्राप्स्यति सुखं पुनः ।
महाभये महारोगे महामारी मये तथा ॥ १९ ॥
दुर्भिक्षे शत्रुसंहारे पठेत्कवचं आदरात् ॥ २० ॥
॥ इति श्री महामृत्युंजय कवचं संपूर्णम् ॥

*धर्मज्ञानगंगा समूह*