ओवी…
पहिली माझी ओवी ग
श्री गणेशाला वंदिन
शुभकार्या द्यावी वृद्धी
बाप्पा गणाला नमन…
दुसरी माझी ओवी ग
विनायकाच्या पायाशी
भाव भक्तीत रंगूनी
पुर्ण तल्लीन होईन…
कृपा करा कृपा करा , गणपती बाप्पा कृपा करा…
तिसरी माझी ओवी ग
नव संकल्प सांधीन
गीत नवे जगण्याचे
ताला सूरात बांधीन…
चवथी माझी ओवी ग
प्रपंच तो विसरेन
साऱ्यांचे मंगल होण्या
सर्व प्रयत्न करीन…
कृपा करा कृपा करा , गणपती बाप्पा कृपा करा…
पाचवी माझी ओवी ग
सत्कर्म हाती घेईन
सुविचारांच्या सन्मार्गी
प्रत्येकास मी लाविन…
सहावी माझी ओवी ग
प्रेम जगाला वाटीन
ज्ञानाच्या अमृताने मी
माणुसकी जगविन…
कृपा करा कृपा करा , गणपती बाप्पा कृपा करा…
सातवी माझी ओवी ग
उपदेशाचे संस्कार
सावरण्या जीवनाला
मिळेल त्यांचा आधार…
आठवी माझी ओवी ग
कुणी घडावा श्रेष्ठसा
भक्तीमध्ये दंग व्हावा
जगी ठरावा ज्येष्ठसा…
कृपा करा कृपा करा , गणपती बाप्पा कृपा करा…
नववी माझी ओवी ग
अभय देण्या स्त्रियांना
क्रूरतेने माखलेल्या
मारायला दानवांना…
दहावी माझी ओवी ग
स्वप्नपूर्ती साठी प्यारी
विघ्नहर्त्या गणेशाची
लिहिली आरती न्यारी…
कृपा करा कृपा करा , गणपती बाप्पा कृपा करा…
- निलेश संगिता अनंत उजाळ.
{७०४५३९८५६१}
दापोली/पिसई.
No comments:
Post a Comment