ओम नमो भगवते दत्तात्रेयाय

!! ॐ नमो श्री भगवते दत्तात्रेयाय !!
जगद्वंद्य अवधूत दिगंबर, दत्तात्रय गुरु तुम्हीच ना ?
अनन्यभावे शरणांगत मी,भवभय वारण तुम्हीच ना ? ll
कार्तवीर्य यदु परशुरामही, प्रबोधिले गुरु तुम्हीच ना ?
स्वामी जनार्दन एकनाथ तरि, कृतार्थ केले तुम्हीच ना ?
नवनारायण सनाथ करुनी,पंथ निर्मिला तुम्हीच ना ?
मच्छिंन्द्रादि जति प्रवृत्त केले, जन उद्धारा तुम्हीच ना ?
दासोपंता घरी रंगले, परमानंदे तुम्हीच ना ?
नाथ सनदिचे चोपदार तरि, श्रीगुरू दत्ता तुम्हीच ना ?
युगायुगी निजभक्त रक्षणा, अवतरता गुरु तुम्हीच ना ?
बालोन्मत्त पिशाच वृत्ती, धारण करता तुम्हीच ना ? ll
स्नान काशिपुरी चंदन पंढरी, संध्या सागरी तुम्हीच ना ?
करुनी भिक्षा करविरी भोजन, पंचाळेश्वरि तुम्हीच ना ?
तुळजापुरी करशुद्धि तांबुल, निद्रा माहुरी तुम्हीच ना ?
करुनी समाधी मग्न निरंतर, गिरनारी गुरु तुम्हीच ना ?
विप्र स्त्रियेच्या वचनी गुंतले, पीठापुरी गुरु तुम्हीच ना ?
श्रीपादवल्लभ नरसिंह सरस्वती, करंजनगरी तुम्हीच ना ?
जन्मताच ओंकार जपुनी, मौन धरियेले तुम्हीच ना ?
मौजी बंधनी वेद वदोनी, जननी सुखविली तुम्हीच ना ? ll
चतुर्थाश्रम जीर्णोद्धारा, आश्रम घेउनी तुम्हीच ना ?
कृष्ण सरस्वति सद्गुरू वंदुनी, तीर्था गमले तुम्हीच ना ?
माधवारण्य कृतार्थ केला, आश्रम देऊनी तुम्हीच ना ?
पोटशुळाची व्यथा हरोनी, विप्र सुखविला तुम्हीच ना ?
वेल उपटुनी विप्रा दिधला, हेमकुम्भ गुरु तुम्हीच ना ?
तस्कर वधूनि विप्र रक्षिला, भक्तवत्सल तुम्हीच ना ?
विप्रस्त्रियेचा पुत्र उठविला, निष्ठा देखुनी तुम्हीच ना ?
हीनजिह्व वेदपाठी केला, सजीव करुनी तुम्हीच ना ? ll
वाडी नरसिंह औदुंबरही, वास्तव्य करुनी तुम्हीच ना ?
भीमा अमरजा संगमी आले, गाणगापुरी गुरु तुम्हीच ना ?
ब्रह्ममुहूर्ती संगमस्थानी, अनुष्ठानि रत तुम्हीच ना ?
भिक्षा ग्रामी करुनी राहतां, मध्याह्नी गुरु तुम्हीच ना ?
ब्रह्मराक्षसा मोक्ष देऊनी, उद्धरीरि मठी तुम्हीच ना ?
वांझ महिषी दुभविले, फुलविले शुष्क काष्ठ तुम्हीच ना ?
नंदीनामा कुष्ठी केला, दिव्यदेहि गुरु तुम्हीच ना ?
त्रिविक्रमा विश्वरूप दाऊनी, कुमसी ग्रामी तुम्हीच ना ? ll
अगणित दिधले धान्य कापुनी, शूद्रा शेत गुरु तुम्हीच ना ?
रत्नाईचे कुष्ठ दवडिले, तीर्थे वर्णित तुम्हीच ना ?
आठही ग्रामी भिक्षा केली, दिपवाळी दिनी तुम्हीच ना ?
भास्कर हस्ते चारसहस्रा, भोजन दिधले तुम्हीच ना ?
निमीषमात्रे तंतुक नेला, श्रीशैल्यासी तुम्हीच ना ?
सायंदेवां काशीयात्रा, दाखविली गुरु तुम्हीच ना ?
चांडाला मुखि वेद वदविले, गर्व हरायाा तुम्हीच ना ?
साठ वर्षे वांझेसी दिधले,कन्यापुत्रही तुम्हीच ना ? ll
कृतार्थ केला मानसपूजनी, नरकेसरि गुरु तुम्हीच ना ?
माहूरचा सतिपती उठवोनी, धर्म कथियला तुम्हीच ना ?
रजकाचा यवनराज बनवुनी, उद्धरिला गुरु तुम्हीच ना ?
अनन्यभावे भजता सेवक, तरतिल वदले तुम्हीच ना ?
कर्दळीवनिचा बहाणा करुनी, गाणगापुरी स्थित तुम्हीच ना ?
निर्गुण पादुका दृष्य ठेऊनि, गुप्त स्वामी मठी तुम्हीच ना ?
विठाबाईचा दास मूढ परि, अंगीकारिला तुम्हीच ना ?
आत्मचिंतनी रमवा निशिदिनी, दीनानाथ गुरु तुम्हीच ना ?
!! ॐ नमो श्री भगवते दत्तात्रेयाय !!
!! दिगंबरा दिगंबरा श्रीपाद श्रीवल्लभ दिगंबरा !!
!! दिगंबरा दिगंबरा श्रीपाद श्रीवल्लभ दिगंबरा !!