मारुती नमस्कार महारुद्र अवतार

मारुति-नमस्कार

महारुद्र अवतार हा सूर्यवंशी ।
अनादिनाथ पूर्ण तारावयासी ।
असा चैत्र पौर्णिमेचा जन्म झाला ।
नमस्कार माझा तया मारुतीला ॥ १ ॥
तनू शिवशक्ति असे पूर्ण ज्याचे ।
किती भाग्य वर्णूं तया अंजनीचें ।
तिच्या भक्तिलागी असा जन्म झाला ।
नमस्कार माझा तया मारुतीला ॥ २ ॥
गिळायासि जातां तया भास्करासी ।
तिथें राहु तो येउनी त्याजपाशीं ।
तया चंडकीर्णा मारितां तो पळाला ।
नमस्कार माझा तया मारुतीला ॥ ३ ॥
खरा ब्रह्मचारी मनातें विचारी ।
म्हणोनी तया भेटला रावणारी ।
दयासागरु भक्तिनें गौरवीला ।
नमस्कार माझा तया मारुतीला ॥ ४ ॥
सुमित्रासुता लागली शक्ति जेव्हां ।
धरी रुप अक्राळ विक्राळ तेव्हां ।
गिरी आणुनी शीघ्र तो ऊठवीला ।
नमस्कार माझा तया मारुतीला ॥ ५ ॥
जगीं भीम तो मारुति ब्रह्मचारी ।
समस्तांपुढें तापसी निर्विकारी ।
नमूं जावयालागिं रे मोक्षपंथा ।
नमस्कार माझा तया हनुमंता ॥ ६ ॥
  ॥ इति मारुति नमस्कार ॥

.......... !!    ओम जय श्री राम    !!  .............
             !!   ओम श्री हनुमंतेय नमः  !!सुप्रभात